ËBARI LË ÁTTO

ËBARI LË ÁTTO

Na halló ë bisóppí biè ërubba bí  pérö booba,

habba hellá hè riössa na ë työkkó ë tyí há séttaèlla.

I bubbú ya ítyí ë bëḿpo biáö, ë itóhi rí a tyátyöri a bantanta, ëá ba sèro o hèya. 

Ërubba è ëbari ë la béëla i kólla,

ebbò  ë työkkó, lë huèhuè ë billó immá.

 

Na halló, lèllo, há la hḾmèlla  ribötyö rihè,

habba hellá ha la ríöbba relá.

Hè habba na ë rihólè  ri ókkama a bahuèe.  

Hè habba hellá, ë ribolló bötéllo, há la áttëa bihuto, há la akkó bësörí la binëkánëkka,       

na bi tyáa öppá’a ká bí la huëa.

 

Ëtyé ë ribötyö rá ömma ri la papèlla'ë,

káhò ette ri la sétella há rá bötyö wellá.

Ë ripë’u ri la mpölla rè, i nö’ó lë bisalóle,

la la työtyóbia ö tösòpísòpi tö la tyiálla tö ë télle bötèllo.

 

Ë bëtyíö bí  la sáalló billakó,

kóri ötyòma bí tyá síbba télle ná iláppu la wera ë bësekka biá betyö.

Ë bilabba biè úwèró a labbé:

a baiè tyía ókkia sibèllö samuáe sí pusálle la bòllá. Ë bétyibi lë birikiriki bi bá úberi ë rihólè rá bòllá bábbò. Ëmmai a baíssö bëllé!

 

Ë billó bí la úkuba kasökasö.

I nokkò ná yè la lëkèlla ba

a bëtyö la púplla o hutya ö löréi,

ë ripé’ám ri ta beí hábba wá’é, tyálla tyóo tótora obbó, Tyá sóttë ë bihóttö bí hétte.

Ë riökkö rí húbièria abëtyö,

ë biátto bí hétyió kua yá bëkotto.

Ë ibarityiö, ë ëhuéhué ë po hétyölla sótte ë biúhá bi lépeya biè i nabba yáó attá. 

Ë bësotyi biè itóhi bi la pélla ö tókkó tö booba.

Hè amma bá la rá i hḾmè yá batyílé babbò,

hé bellá bá la hútta ë ibekké biábo, bá la mpura ë biéllá biábo, bá háam bëlokka biè ëkura.